من کا میل مٹا دیتی ھے ـ
خوشبو انگ بسا دیتی ھے ـ
سینہ خیر بنا دیتی ھے ـ
پیر نہیں ہیں تھکتے جس میں ـ
ایسا رقص کرا دیتی ھے ـ
سب رنگوں سے جان چھڑا کرـ
یار کا رنگ چڑھا دیتی ھے ـ
پوچھ رھے ھو بابا بلھیا ـ
اور محبّت کیا دیتی ھے ؟؟

اور کسی سے کب ھوتا ھے ـ
یہ "کُن" کہہ دے تب ھوتا ھے ـ
اس کے دم سے سب ھوتا ھے ـ
اس کا مالک رب ھوتا ھے ـ
رمز الف سمجھا دیتی ھے ـ
پوچھ رھے ھو بابا بلھیا ـ
اور محبّت کیا دیتی ھے ؟؟

اس کی مٹی بھی سونا ھے ـ
اس کا کھونا بھی ھونا ھے ـ
اس کی مستی ھی وکھری ھے ـ
یہ الّھڑ ھے اور اتھری ھے ـ
یہ ھونی پر آ جائے تو ـ
سو بُلّھے نچوا دیتی ھے
پوچھ رھے ھو بابا بُلھیا !
اور محبّت کیا دیتی ھے ؟؟

اس کے جوگ بجوگ نرالے ـ
یہ کب یار کا بھید اچھالے ـ
مسجد مندر چرچ شوالے ـ
سارے اس کے دیکھے بھالے ـ
آ اس کے ھونے سے ھو جا ـ
اور بننے سے جان چھڑا لے ـ
لے سُنیاری در پر آئی ـ
پریتم کے کنگن بنوا لے ـ
تن کے سب جھگڑے چھڑوا کر ـ
من درشن کروا دیتی ھے ـ
پوچھ رھے ھو بابا بلھیا ،
اور محبّت کیا دیتی ھے ؟؟؟